Isotope van neptunium

Neptunium (Np) is ’n kunsmatige chemiese element en ’n standaardmassa kan dus nie bepaal word nie. Dit het geen stabiele isotope nie en word dus as radioaktief geklassifiseer. Die meeste van die 20 isotope het ’n relatief kort halfleeftyd.

In die natuur kom net spoorhoeveelhede neptunium voor; die meeste isotope is sinteties in ’n laboratorium berei. Die eerste sintetiese isotoop was ²³⁹Np, in 1940. Dit is geskep deur ²³⁸U met neutrone te bestook om ²³⁹U te vervaardig, wat toe betaverval ondergaan het tot ²³⁹Np.

Die stabielste neptuniumisotope is ²³⁷Np (met ’n halfleeftyd van 2,14 miljoen jaar), ²³⁶Np (154 000 jaar) en ²³⁵Np (396,1 dae). Alle ander isotope het ’n halfleeftyd van minder as 4,5 dae; die meeste s’n is korter as 50 minute.